یہ آیتِ کریمہ گویا “ نیکی کی دعوت “ کے دِینی کام  کا پُورا نصاب (Syllabus)ہے۔ پہلے نیکی کی دعوت دینے والے کی عظمت و شان کا بیان سُنا ، اب آئیے! اس آیتِ کریمہ کی روشنی میں نیکی کی دعوت دینے کا دُرُست انداز اور طریقہ سیکھتے ہیں۔ چنانچہ اللہ پاک نے فرمایا : اُدْعُ     (بلاؤ...!)۔ ذِہن میں سُوال اُٹھتا ہے : کسے بُلائیں؟ مفسرینِ کرام فرماتے ہیں : سارِی دُنیا کے انسانوں کو۔ ^([1])

امام غزالی رَحمۃُ اللہِ عَلَیْہ فرماتے ہیں : مُحْتَسَبْ (یعنی جسے نیکی کی دعوت دینی ہے) اس کی صِرْف ایک شرط ہے : وہ انسان ہو۔ ^([2]) جو بھی انسان ہے ، وہ جیسا بھی ہے ، اسے نیکی کی دعوت دی جائے گی ، کافِر ہے تو اسے ایمان کی دعوت دی جائے گی ، گنہگار ہے تو اسے نیک کاموں کی دعوت دی جائے گی ، جو ریاکار ہے ، اسے اخلاص کی دعوت دی جائے گی ، جو حَسَد کا شِکار ہے ، اسے شکر گُزاری کی دعوت دی جائے گی ، جھوٹ بولنے والے کو سچ کی دعوت دی جائے گی ، خیانت کرنے والے کو امانت داری کی دعوت دی جائے گی ، غرض؛ جو انسان ہے ، اسے نیکی کی دعوت دی جائے گی اور اس کے حَسْبِ حال دی جائے گی۔

اللہ پاک نے فرمایا :  اُدْعُ     (بلاؤ...!)۔ اب سُوال ذِہن میں آتا ہے : کس طرف بُلائیں؟ اس کا جواب اللہ پاک نے ارشاد فرمایا :  اِلٰى سَبِیْلِ رَبِّكَ (اپنے رَبّ کے راستے کی طرف)۔ رَبّ کا رستہ کیا ہے؟ ایمان رَبّ کا رستہ ہے ، سچّے اچھے عقائد ربّ کا رستہ ہیں ، قرآن رَبّ کا رستہ ہے ، عِلْمِ دین رَبّ کا رستہ ہے ، نماز رَبّ کا رستہ ہے ، روزہ رَبّ کا رستہ