عقیدۂ ختمِ نبوت کے بارے میں احادیثِ مبارکہ

 پیارے اسلامی بھائیو! جس طرح عقیدۂ ختمِ نبوت کا ذکر قرآن مجید میں بالکل واضح ہے اسی طرح احادیث میں بھی پیارے آقا مدینے والے مصطفٰے صَلَّی اللہ  تَعَالٰی عَلَیْہِ وَاٰلِہٖ وَسَلَّمَ نے اپنا آخری نبی ہونا بالکل واضح بیان فرمایا ہے آئیے اس حوالے سے چند  احادیثِ مبارکہ ملاحظہ کیجئے:

(1)چنانچہ نبیِّ کریم صلَّی اللہ  علیہ واٰلہٖ وسلَّم نے ارشاد فرمایا:میری اور تمام انبیاء کی مثال اس شخص کی طرح ہے جس نے ایک عمده اور خوبصورت عمارت بنائی اور لوگ اس کے آس پاس چکّر لگا کر کہنے لگے :ہم نے اس سے بہترین عمارت نہیں  دیکھی مگر یہ ایک اینٹ( کی جگہ خالی ہے جو کھٹک رہی ہے) تو میں (اس عمارت کی) وہ (آخری) اینٹ ہوں۔ (مسلم، ص965، حدیث: 5959)

 (2)بے شک رسالت اور نبوت ختم ہوگئی، اب میرے بعد نہ کوئی رسول ہے نہ کوئی نبی۔ (ترمذی، 4/121، حدیث:2279) (3)اے لوگو! بے شک میرے بعد کوئی نبی نہیں اور تمہارے بعد کوئی اُمّت نہیں۔(معجم کبیر،ج 8،ص115، حدیث:7535) (4)بےشک میں اللہ  تعالیٰ کے حضور لَوحِ محفوظ میں خَاتَمُ النَّبِیِّین (لکھاہوا) تھا جب حضرت آدم عَلَیْہِ السَّلام  ابھی اپنی مٹی میں گُندھے ہوئے تھے۔ (کنز العمال، جزء:11،ج6،ص188، حدیث:31957)

مُحَمَّدِ مصطفےٰ!   سب سے آخری نبی!                احمدِ مجتبیٰ!        سب سے آخری نبی!

آمنہ کا لاڈلا!      سب سے آخری نبی!                شاہِ ہر دوسرا!      سب سے آخری نبی!

تاجدارِ انبیا!       سب سے آخری نبی!                ہیں حبیبِ کبریا!    سب سے آخری نبی!

عقیدہ سب صحابہ کا!                 سب سے آخری نبی!        عقیدہ اَہْلِ بیت کا!        سب سے آخری نبی!

نظریہ غوث کا   سب سے آخری نبی!                اَوْلیا کا نظریہ!     سب سے آخری نبی!

ہے رضا کا نظریہ!                   سب سے آخری نبی!        نظریہ عطَّار کا!         سب سے آخری نبی!