مُوَافقات جو مطلب آهي: قرآنِ ڪريم جون اهي آيتون جيڪي اَمِيرُ المُؤمِنِين حضرت عمر فاروقِ اعظم رَضِىَ اللهُ عَنۡه جي راءِ جي مُوَافِق نازِل ٿيون؛ مثال طور حضرت عمر فاروقِ اعظم رَضِىَ اللهُ عَنۡه بارگاھ رسالت ۾ ڪا راءِ پيش ڪئي، ان تي قرآنِ ڪريم جي آيت نازِل ٿي وئي، حضرت عمر فاروقِ اعظم
رَضِىَ اللهُ عَنۡه جي زبان مبارڪ مان ڪو جملو نڪتو، ان تي آيت سڳوري نازِل ٿي وئي، حضرت عمر فاروقِ اعظم رَضِىَ اللهُ عَنۡه ڪو ڪم ڪيو، ان جي درست هئڻ تي قرآنِ ڪريم جي آيت نازِل ٿي وئي۔ اهي ڪُل 20 يا ان کان به وڌيڪ آيتون آهن جيڪي حضرت عمر فاروقِ اعظم رَضِىَ اللهُ عَنۡه جي راءِ جي مُوَافِق نازِل ٿيون، انهن کي ”مُوَافقاتِ عمر رَضِىَ اللهُ عَنۡه “ چيو ويندو آهي۔

مثال طور * هڪ ڀيري حضرت عمر فاروقِ اعظم رَضِىَ اللهُ عَنۡه عرض ڪيو: يا رسول الله صَلَّى اللّٰهُ عَلَيۡهِ واٰلِهٖ وَسَلَّمَ! ڇا اسان مقامِ ابراهيم کي مُصَلّو نه بڻائي ڇڏيون، هن تي آيتِ ڪريمه نازِل ٿي:

وَ اتَّخِذُوْا مِنْ مَّقَامِ اِبْرٰهٖمَ مُصَلًّىؕ-  (پاره1،سورۃالبقرۃ:125)          

 ترجموڪنزالايمان: ۽ ابراهيم جي بيهڻ جي جاءِ کي نماز پڙهڻ جي جاءِ مقرر ڪري وٺو،

   * هڪ ڀيري حضرت عمر فاروقِ اعظم رَضِىَ اللهُ عَنۡه عرض ڪيو: يا رسول الله صَلَّى اللّٰهُ عَلَيۡهِ واٰلِهٖ وَسَلَّمَ! جيڪڏهن اسان صَفَا ۽ مَروَه جو طواف (يعني سَعِي ڪيون، صَفَا و مَروَه جا چڪر لڳائيندا) ڪيون ته (ڪيترو سٺو لڳندو...!)، هن تي اها آيت سڳوري نازِل ٿي:

اِنَّ الصَّفَا وَ الْمَرْوَةَ مِنْ شَعَآىٕرِ اللّٰهِۚ-فَمَنْ حَجَّ الْبَیْتَ اَوِ اعْتَمَرَ فَلَا جُنَاحَ عَلَیْهِ اَنْ یَّطَّوَّفَ بِهِمَاؕ-

                                     (پاره2،سورۃالبقرۃ:158)

ترجموڪنزالايمان: بيشڪ صفا ۽ مروه الله جي نشانين مان آهن، پوءِ جيڪو ان گهر جو حج يا عمرو ڪري، اُن تي گناھ نه آهي جو انهن ٻنهي جو طواف ڪري.