Hamd o Naat

سلسلہ:حمد و نعت

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مناجات

یا ربِّ محمد مِری تقدیر جگادے

یا ربِّ محمد مِری تقدیر جگادے

صحرائے مدینہ مجھے آنکھوں سے دِکھادے

پیچھا مِرا دنیا کی محبّت سے چُھڑادے

یارب مجھے دیوانہ مدینے کا بنادے

دِل عشقِ محمد میں تڑپتا رہے ہر دَم

سینے کو مدینہ مِرے اللہ بنادے

بہتی رہے  اکثر شَہِ ابرار کے غم میں

روتی ہوئی وہ آنکھ مجھے میرے خدا دے

ایمان پہ دے موت مدینے کی گلی میں

مَدْفَن مِرا محبوب کے قدموں میں بنادے

اللہ ملے حج کی اِسی سال سعادت

بَدکار کو پھر روضۂ محبوب دِکھادے

عطّار سے محبوب کی سنّت کی لے خدمت

ڈنکا یہ تِرے دین کا دنیا میں بجادے

از: امیرِ اہلِ سنت دامت برکاتہم العالیہ

وسائلِ بخشش،ص 112

نعت

سواری دولہا کی آن پہنچی

سواری دولہا کی آن پہنچی، گناہگاروں کی بن پڑی ہے

مچل رہے ہیں تڑپ رہے ہیں، برات ساری اَڑی کھڑی ہے

صِراط پر کوئی نام لیوا، بِلک بِلک کر یہ کہہ رہا ہے

حُضور آئیں مجھے بچائیں، کہ جان مشکل میں آپڑی ہے

کسی سے اعمال کی ہے پُرسِش، کسی کے اعمال تُل رہے ہیں

کسی کو میزاں پہ لا رہے ہیں، نِدا کسی کی گھڑی گھڑی ہے

تمہاری اُمّت کی انبیا نے، ہے کی تمنّا شفیعِ محشر

کہ دن قِیامت کے پیشِ داور، تمہاری اُمّت بڑھی چڑھی ہے

قُصورِ جنّت سجے سجائے، قُصور والوں کو بٹ رہے ہیں

پَرے جمائے صفوں کو باندھے، ہر ایک حُورِ جِناں کھڑی ہے

مدینہ والے کے لاڈلے کا، ہے خاص بندہ رضا ہمارا

تو پھر ہے کیا غم بچا ہی لیگا، اگرچہ منزل بڑی کڑی ہے

طُفیلِ حَسنَین یا حَبِیبی، ہمارے مَخدوم شاہزادے

رہیں سدا ایک جاں دو قالِب، دعائے ایوؔب ہر گھڑی ہے

از: مولانا سیّد ایوب علی رضوی رحمۃ اللہ علیہ

شمائمِ بخشش،ص71