Book Name:Dam Dam Dastgeer
کیوں نہ قاسِم ہو کہ تُو ابنِ ابی القاسم ہے کیوں نہ قادِر ہو کہ مختار ہے بابا تیرا([1])
جس رات آپ کی وِلادت ہوئی، اُس رات اللہ پاک کے مَحْبُوب نبی، رسولِ ہاشمی صَلَّی اللہ عَلَیْہِ وَ آلِہٖ وَسَلَّم آپ کے والِد کی خواب میں تشریف لائے اور مبارَک باد دیتے ہوئے فرمایا: یَا اَبَاصَالِحِ! یعنی اے ابو صالح! اَعْطَاکَ اللہ اِبْنًا اللہ پاک نے آپ کو جو بیٹا عطا فرمایا ہے، وَہُوَ وَلِیِّیْ وَ مَحْبُوْبِیْ وَ مَحْبُوْبُ اللہ تَعَالٰی وہ میرا دوست بھی ہے، میرا بھی مَحْبُوب ہے اور اللہ پاک کا بھی مَحْبُوب ہے وَسَیَکُوْنُ لَہٗ شَانٌ فِیْ الْاَوْلِیَآءِ وَالْاَقْطَابِ کَشَانِیْ بَیْنَ الْاَنْبِیَآءِ وَالرُّسُلِ (یعنی اے ابو صالِح! سُن لو!) تمہارے اِس شہزادے کی شان ولیوں میں ایسی ہی ہو گی، جیسے میری شان نبیوں اور رسولوں میں ہے۔([2])
غوثِ اعظم درمیانِ اَوْلیا چُوْں مُحَمَّد دَرْمِیَانِ اَنبیا
وضاحت: اولیا کے درمیان غوثِ اعظم کا رُتبہ ایسے ہی ہے جیسے مُحَمَّد صَلَّی اللہ عَلَیْہِ وَ آلِہٖ وَسَلَّم کا رُتبہ نبیوں میں ہے۔
معلوم ہوا؛ جیسے رسولِ اکرم، نورِ مُجَسَّم صَلَّی اللہ عَلَیْہِ وَ آلِہٖ وَسَلَّم امامُ الانبیا ہیں، یُونہی غوثِ پاک رحمۃُ اللہ علیہ امامُ الاولیا ہیں، جیسے مَحْبُوبِ ذیشان صَلَّی اللہ عَلَیْہِ وَ آلِہٖ وَسَلَّم نبیوں کے سردار ہیں، یُونہی غوثِ پاک رحمۃُ اللہ علیہ ولیوں کے سردار ہیں۔
واہ کیا مرتبہ اے غوث! ہے بالا تیرا اُونچے اُونچوں کے سَروں سے قدم اعلیٰ تیرا