اَمِّی جان کو سلام کرتے

مشہور صحابئ رسول ہیں: حضرت ابوہریرہ رَضِیَ اللہُ تَعَالٰی عَنْہُ  ۔ آپ کا مَعْمُول  مبارَک تھا کہ جب گھر میں داخِل ہوتے یا جب گھر سے باہَر جانے لگتے تو دروازے کے پاس کھڑے ہو جاتے، کہتے: اَمِّی جان...!! اَلسَّلَامُ عَلَيْكِ وَرَحْمَةُ اللَّهِ وَبَرَكَاتُهُ۔ آپ کی اَمِّی جان کہتیں: بیٹا...!! وَعَلَيْكَ وَرَحْمَةُ اللَّهِ وَبَرَكَاتُهُ۔ پِھر آپ کہتے: رَحِمَكِ اللَّهُ كَمَا رَبَّيْتِنِيْ صَغِيرًااَمِّی جان! اللہ  پاک آپ پر رحم فرمائے، آپ نے بچپن میں میری خوب دیکھ بھال فرمائی۔ اَمِّی جان فرماتیں: رَحِمَكَ اللَّهُ كَمَا بَرَرْتَنِي كَبِيرًا اللہ  پاک تجھ پر بھی رحم فرمائے، تم نے بڑھاپے میں مجھ سے بہت اچھا سلوک کیا۔ ^([1])

کتنا  پیارا اَنداز ہے۔ کاش! ہم بھی اپنانے میں کامیاب ہو جائیں۔

اللہ  پاک کا نام لیجیے!

حدیث شریف میں ہے: جب آدمی گھر میں داخل ہو تے وقت اور کھاناکھاتے وقت اللہ  پاک کا ذکر کر تا ہے تو شیطان کہتا ہے: آج یہاں نہ تمہاری رات گزرسکتی ہے، نہ تمہیں کھانا مل سکتا ہے۔ جب انسان گھر میں اللہ  پاک کا نام لیے  بغیر داخل ہوتا ہے تو شیطان کہتاہے:آج کی رات یہیں گزرے گی۔ پِھر جب کھانے کے وقت اللہ  پاک کانام نہیں لیتا تو وہ کہتا ہے : تمہیں ٹھکانہ بھی مل گیا اور کھانابھی مل گیا ۔ ^([2])

پتا چلا؛ گھر میں داخِل ہوتے وقت اللہ  پاک کا نام بھی لینا چاہیے ، مثلاً گھر میں داخِل ہوتے وقت بِسْمِ اللہ  پڑھ لیجیے! اِنْ شَآءَ اللہ  الْکَرِیْم! شیطان سے حفاظت رہے گی۔