ساتھ ساتھ نفل روزے رکھنے والے بن جائیں۔  اٰمِیْن بِجَاہِ النَّبِیِّ الْاَمِیْن صَلَّی اللہ تَعَالٰی عَلَیْہِ وَاٰلہٖ وَسَلَّم

صَلُّوْا عَلَی الْحَبِیْب!                                                           صَلَّی اللہُ عَلٰی مُحَمَّد

مَحَبَّتِالٰہی کیلئے حضرت داؤد  علیہ السلام  کی دُعا

 پیارے اسلامی بھائیو!اللہ پاک کی حقیقی مَحَبَّت حاصل کرنے کے لئے اللہ والوں کی سیرت  پر بھی چلنا چاہئے اور ساتھ ہی ساتھ مَحَبَّتِ الٰہی حاصل کرنےکے لئے دُعا بھی کرنی چاہئے، چنانچہ

حضرت ابو درداء رَضِیَ اللہُ  عَنْہُ سے روایت ہے:رسولِ کریم صَلَّی اللہُ  عَلَیْہِ واٰلِہٖ وَسَلَّمَ کا فرمان ہے: حضرت داؤد  علیہ السلام  یہ دعا مانگا کرتے تھے:اَللّٰہُمَّ اِنِّیْ اَسْئَلُکَ حُبَّکَ وَحُبَّ مَنْ یُّحِبُّکَ وَالْعَمَلِ الَّذِیْ یُبَلِّغُنِیْ حُبَّک یعنی اے اللہ پاک!میں تجھ سے تیری، تیرے محبوب بندوں کی مَحَبَّت اور ان اَعمال کی مَحَبَّت مانگتا ہوں جو مجھے تیری مَحَبَّت تک پہنچا دیں، اَللّٰہُمَّ اجْعَلْ حُبَّکَ اَحَبَّ اِلَیَّ مِنْ نَفْسِیْ وَمَالِیْ وَاَہْلِیْ وَمِنَ الْمَاءِ الْبَارِدِ یعنی:اے اللہ پاک!اپنی مَحَبَّت کو میرے لئے میری جان ومال،گھر والوں اور ٹھنڈے پانی سے زیادہ محبوب بنادے۔(مشکاۃ المصابیح کتاب الدعوات باب جامع الدعا،۱/ ۴۶۵ حدیث:۲۴۹۶)

پیارے اسلامی بھائیو!آپ نےسُنا کہ اللہ پاک کے پیارے نبی حضرت  داؤد  علیہ السلام  اللہ پاک سے اُس کی مَحَبَّت کی دُعا مانگا کرتے،لہٰذا ہمیں بھی چاہئے کہ ہم بھی اپنے رَبّ کریم سے اُس کی مَحَبَّت کی دُعائیں مانگا کریں، یقین کیجئے!مَحَبَّتِ الٰہی وہ عظیم نعمت ہے جسے یہ نصیب ہوجائے اُسے عبادت کی لذّت اور ایمان کی چاشنی نصیب ہوجائے۔