تجھ کو غافِل فِکْرِ عقبیٰ کچھ نہیں                          کھا نہ دھوکا، عیشِ دُنیا کچھ نہیں

زِندگی ہے چند روزہ کچھ نہیں                           کچھ نہیں اس کا بھروسہ کچھ نہیں

ایک دِن مرنا ہے، آخر موت ہے

کر لے جو کرنا ہے، آخر موت ہے

عیش کر، غافِل نہ تُو آرام کر                            مال حاصِل کر، نہ پیدا نام کر

یادِ حق دُنیا میں صبح و شام کر                             جس لئے آیا ہے تُو وہ کام کر

ایک دِن مرنا ہے آخر موت ہے

کر لے جو کرنا ہے آخر موت ہے

عیش وعشرت کے لئے انساں نہیں             یاد رکھ تُو بندہ ہے، مہماں نہیں

غفلت و سُستی تجھے شایاں نہیں                       بندگی کر تُو اگر ناداں نہیں

ایک دِن مرنا ہے آخر موت ہے

کر لے جو کرنا ہے آخر موت ہے

تَرْک اَب ساری فضولیات کر                          یوں نہ ضائع اپنے تُو اَوْقات کر

رہ نہ غافِل یادِ حق دِن رات کر                         ذِکْر و فِکْر و موت کی تُو بات کر

ایک دِن مرنا ہے آخر موت ہے

کر لے جو کرنا ہے آخر موت ہے

کُوچ ہائے بے خبر! ہونے کو ہے                  ہائے یہ غفلت! سحر ہونے کو ہے

باندھ لے توشہ سفر ہونے کو ہے                   ختم بس اب ہر بشر ہونے کو ہے

ایک دِن مرنا ہے آخر موت ہے

کر لے جو کرنا ہے آخر موت ہے

صَلُّوا عَلَي الحَبيب!                                   صَلَّي اللّٰه عَلٰي مُحَمَّد