سمجھنے میں غلطی کا اِمْکان موجود ہے ، لہٰذا خواب میں دیئے ہوئے حکم پر عمل کرنے سے پہلے حکمِ شریعت کو دیکھنا ہو گا ، اگر خواب والی بات شریعت سے نہیں ٹکراتی تو بے شک اُس پر عمل کیا جاسکتا ہے تا ہم خواب میں ملے ہوئے حکم پرعمل کرنا شَرْعاً واجب نہیں۔ ^([1])

مِرے تم خواب میں آؤ مرے گھر روشنی ہو گی     مِری قسمت جگا جاؤ عِنایَت یہ بڑی ہو گی^([2])

صَلُّوْا عَلَی الْحَبیب!                                               صَلَّی اللّٰہُ عَلٰی مُحَمَّد          

8 آیات کی تفسیر

 اے عاشقانِ رسول ! قرآنِ کریم میں 8 آیات کی ایک مختصر سُورت ہے ، سورۂ “ اَلَمْ نَشْرَح “  اس سورۂ مبارکہ میں نبی اکرم ، نورِ مجسم صَلَّی اللہُ عَلَیْہِ وَاٰلِہٖ وَسَلَّم  کی مبارک سیرت اور آپ صَلَّی اللہُ عَلَیْہِ وَاٰلِہٖ وَسَلَّم  کی شان و عظمت کا بیان ہے۔ بڑی مشہور آیت ہے :

وَ رَفَعْنَا لَكَ ذِكْرَكَؕ(۴)  (پارہ30 ، سورۃالم نشرح : 4)                           

ترجمہ کنزُ العِرفان : اور ہم نے تمہاری خاطر تمہارا ذکر بلندکر دیا۔

 یہ آیتِ کریمہ بھی سورۂ “ اَلَمْ نَشْرَح “ کی ہے۔ والِدِ اعلیٰ حضرت مولانا نقی علی خان رَحمۃُ اللہِ عَلَیْہ نے اس سورۂ مبارکہ کی تفسیر لکھی ہے اور مَاشَآءَ اللہ! شان و کمال دیکھئے کہ  قرآنِ کریم کی 8 مختصر آیات کی یہ تفسیر بڑے سائز کے 445 صفحات پر مشتمل ہے اور اگر اسے دورِ حاضِر کے تقاضوں کے مطابق پبلش (Publish)کیا جائے تو شاید اس کے صفحات 1000 تک پہنچ جائیں۔ مولانا نقی علی خان رَحمۃُ اللہِ عَلَیْہ کی لکھی ہوئی اس مبارک تفسیر کا عربی نام ہے : “ اَلْکَلَامُ الْاَوْضَحْ فِی تَفْسِیْرِ اَلَمْ نَشْرَحْ “  اور اُردو نام ہے : انوارِ جمالِ مصطفےٰ۔