باطِن کی صَفائی ہو ہی نہیں سکتی۔ لہٰذا ہمیں دِل سے دُنیا کی محبت نکالنی ہی ہو گی۔

ہاں! یہ جو خدشات ہمارے ذہن میں اُٹھتے ہیں ، دِل میں وسوسے پیدا ہوتے ہیں ، ان کا حل تلاش کرنا چاہئے۔ اَصْل میں یہ خدشے دُرُست اسلامی معلومات نہ ہونے کی وجہ سے پیدا ہوتے ہیں۔ دِل سے غَیْرُ اللہ کی محبت نکالنے کا ، دِل کو دُنیا کی محبت سے خالی کر لینے کا ہر گز یہ مطلب نہیں ہے کہ ہم کاروبار چھوڑ دیں ، کام کاج چھوڑ دیں ، اپنی اولاد کو بےیار و مددگار چھوڑ کر ایک کونے میں لگ کر بیٹھ جائیں۔ دِل سے دُنیا کی ، غَیْرُ اللہ کی محبت نکال دینے کا دُرُست مطلب ہوتا ہے : دُنیا میں رہنا مگر دُنیا کو دِل میں نہ آنے دینا۔ دیکھئے : داتا حُضُور رَحمۃُ اللہِ عَلَیْہ نے فرمایا : مَنْ نَظَرَ جس نے نِگاہ کی ، جس نے نَظر کی۔ یہ اَصْل نکتے کی بات ہے۔ مطلب یہ ہے کہ اپنی تَوَجُّہ کا مرکز اللہ پاک کی رِضا کو بنانا ہے۔  ہم اگر قرآنِ کریم کو پڑھیں ، سمجھیں تو  قرآنِ کریم میں جہاں دُنیا سے بےرغبتی کی ترغیب ہے یا دُنیا سے محبت کی مَذَمَّت کا بیان ہے ، ایسے کئی مقامات پر اللہ پاک نے لفظ اِیْثَار ذِکر فرمایا ہے۔ مثلاً پارہ : 30 ، سورۂ نازعات ، آیت : 38 میں سرکشی کرنے والوں کے متعلق فرمایا :

وَ اٰثَرَ الْحَیٰوةَ الدُّنْیَاۙ(۳۸)

ترجمہ کنز الایمان : اور دنیا کی زندگی کو ترجیح دی

اس آیت میں لفظ اٰثَرَ آیا ہے ، یہ اِیْثار سے بنا ہے اور اِیْثار کا معنی ہوتا ہے : ترجیح دینا۔  آیت کا معنی یہ ہے کہ جو بندہ دُنیا کو آخرت پر ترجیح دے ، نفسانی خواہشات کے پیچھے چلتے ہوئے کفر کا رستہ اختیار کرے ، اس کا ٹھکانا جہنّم ہے۔ ^([1])