نُور سے سب فَضا اس کی مَعْمُور ہے             میرے میٹھے مدینے کی کیا بات ہے

نُور پھولوں میں ہے ، نور کلیوں میں ہے         نور بازار میں ، نور گلیوں میں ہے

دَشْت و کہسار پر نُور ہی نُور ہے                 میرے میٹھے مدینے کی کیا بات ہے

کیا بیاں دَشْتِ طیبہ کی ہوں خوبیاں             پھول تو پھول کانٹے بھی دلکش یہاں

پتے پتے پہ چھایا ہوا نور ہے                    میرے میٹھے مدینے کی کیا بات ہے^([1])

صَلُّوْا عَلَی الْحَبیب!                                               صَلَّی اللّٰہُ عَلٰی مُحَمَّد

اَحادیث میں بیان کئے گئے اَسْمائے مدینہ

(7-9) : طَابَہ ، طَیْبَہ ، طَیِّبَہ

پیارے اسلامی بھائیو!  مدینۂ طَیِّبَہ کے مبارک ناموں میں سے وہ نام جو پیارے آقا ، مکی مدنی مصطفےٰ صَلَّی اللہُ عَلَیْہِ وَاٰلِہٖ وَسَلَّم  کے زیادہ پسندیدہ ہیں ، وہ ہیں : طَابَہ ، طَیْبَہ ، طَیِّبَہ۔

مُسْلِمْ شریف کی حدیثِ پاک میں ہے ، سرکارِ عالی وقار مدینے کے تاجدار صَلَّی اللہُ عَلَیْہِ وَاٰلِہٖ وَسَلَّم  نے فرمایا :  اِنَّ اللہَ سَمَّی الْمَدِیْنَۃَ طَابَةَ بے شک اللہ پاک نے مدینے کا نام طابَہ رکھا ہے۔ ^([2]) ایک حدیثِ پاک میں ہے : اِنَّ اللہَ اَمَرَنِیْ اَنْ اُسَمِّیَ الْمَدِیْنَۃَ طَابَةَ بے شک اللہ پاک نے مجھے حکم دیا کہ مدینے کا نام طابَہ رکھوں۔ ^([3]) حضرت وَہْب بِن مُنَبِّہ رَحمۃُ اللہِ عَلَیْہ سے روایت ہے کہ تورَیت شریف (یعنی حضرت موسیٰ عَلَیْہِ السَّلَام پر نازِل ہونے والی آسمانی کتاب) میں مدینۂ پاک کا نام “ طابَہ ، طَیْبَہ اور طَیِّبَہ “ ہے۔ ^([4])