جو ہیں وَقف، سنّت کی خدمت کی خاطر                                 انہیں حشر میں بخشوا غوثِ اعظم

جو روزانہ دیتے ہیں نیکی کی دعوت                                        انہیں حشر میں بخشوا غوثِ اعظم

سفر قافلے میں جو کرتے ہیں ہر ماہ                                        انہیں حشر میں بخشوا غوثِ اعظم

جو دیں راہِ مولا میں بارہ مہینے                                              انہیں حشر میں بخشوا غوثِ اعظم

جو اپناتے ہیں ''مدنی انعام'' اکثر                                          انہیں حشر میں بخشوا غوثِ اعظم

صَلُّو ْا عَلَی الْحَبِیْب!                                       صَلَّی اللہُ تَعَالٰی عَلٰی مُحَمَّد

علم کےسمندر

میٹھے میٹھے اسلامی بھائیو! سرکارِ غوثِ اعظم رَحْمَۃُ اللّٰہ عَلَیْہ اللہ پاک کے بہت بڑے ولی ہونے کے ساتھ ساتھ اپنے وقت کے بہت بڑے امام، مفتیِ اسلام اور علمِ دِین کے ایسے سمندرتھے کہ جس کا کنارہ نہیں ۔ آپ کا علمی مقام اس قدر بلند تھا کہ بڑے بڑے علماء آپ کے سمندرِ علم  سے اپنی پیاس بجھاتے نظر آتے ہیں۔

علامہ ابنِ جوزی رَحْمَۃُ اللّٰہ عَلَیْہ كے بارے میں آتا ہے کہ وہ اپنے وقت کے بہت بڑے عالِم و امام تھے، آپ نے عِلْمِ قرآن،عِلْمِ حدیث ،عِلْمِ فِقْہ، جُغْرافِیہ،عِلْمِ طِب،تاریخ ،تفسیر،عِلْمِ نُجُوم، حساب،لُغَت اور نحو وغیرہ کے علاوہ دیگر بہت سے عُلوم وفُنُون میں بھی قابلِ قدر کتا بیں تصنیف فرما ئیں،آپ کی تصانیف کی تعداد تین سو (300)سے زیادہ بتائی جاتی ہے، جن میں کافی کتابیں کئی کئی جلدوں پر مشتمل  ہیں۔^([1])