قرآنِ کریم پڑھئے ، ترجمہ پڑھئے ، تفسیر پڑھ کر قرآنِ کریم سمجھئے ، اس کی برکتیں لوٹیے اور دوسروں کو بھی ترغیب دلائیے۔

صَلُّوْا عَلَی الْحَبیب!                                                           صَلَّی اللّٰہُ عَلٰی مُحَمَّد

پیارے اسلامی بھائیو! بیان کو اختتام کی طرف لاتے ہوئے سُنّت کی فضیلت اور چند آدابِ زندگی بیان کرنے کی سَعَادت حاصِل کرتا ہوں۔ تاجدارِ رسالت ، شہنشاہِ نبوت صَلَّی اللہُ عَلَیْہِ وَاٰلِہٖ وَسَلَّم نے فرمایا : مَنْ تَمَسَّكَ بِسُنَّتِيْ عِنْدَ فَسَادِ اُمَّتِيْ فَلَهُ اَجْرُ مِائَةَ شَهِيْدٍ یعنی اُمت کے فساد کے وقت جو شخص میری سنت پر مضبوطی سے عمل کرے گا اسے سو شہیدوں کا ثواب عطا ہو گا۔ ⁽[1]⁾

ہر کام شریعت کے مطابِق میں کروں کاش!         یارب تو مبلغ مجھے سُنّت کا بنا دے^([2])

صَلُّوْا عَلَی الْحَبیب!                                                           صَلَّی اللّٰہُ عَلٰی مُحَمَّد

 “ نیک فال لینا “ سُنَّتِ مصطفےٰ ہے

فرمانِ مصطفےٰ صَلّی اللہُ عَلَیْہ وآلِہ وسَلَّم : بَد فالی کوئی چیز نہیں اور فال اچھی چیز ہے۔ لوگوں نے عرض کیا : فال کیا چیز ہے؟فرمایا : اچھا کلمہ جو کسی سے سنے۔ ^([3])

نیک فال کا مطلب : مثلاً کسی کام سے نکلے ، راستے میں تِلاوتِ قرآن کی آواز سُن لی یا کسی بزرگ کی زیارت ہو گئی تو اس سے اُمِّید باندھنا کہ اِنْ شَآءَ اللہُ الْکَرِیْم! مقصد میں کامیابی ہو گی ، یہ نیک فال ہے۔