taziyat o ayadat k mutfariq peghamat

مفتی شمس الہُدیٰ مصباحی مُدَّظِلُّہُ الْعَاْلِی کی عیادت

نَحۡمَدُہٗ وَ نُصَلِّیۡ وَ نُسَلِّمُ عَلٰی رَسُوۡلِہِ النَّبِیِّ الۡکَرِیۡمِ

سگِ مدینہ محمد الیاس عطار قادری رضوی عُفِیَ عَنۡہُ کی جانب سےمحسنِ دعوتِ اسلامی الحاج مفتی شمس الہدیٰ مصباحی اَلسَّلَامُ عَلَیۡکُمۡ وَرَحۡمَۃُاللّٰہِ وَ بَرَکَاتُہٗ !

مُبَلِّغِ دَعوتِ اسلامی محمد آصف(یورپ) نے یہ پیغام دیا ہے کہ آپ جناب کی خدمت میں بُخار نے حاضری دی ہوئی ہے۔ اللہ تَبَارَکَ وَ تَعَالٰیآپ کو صَبر و اَجر سے مشرَّف فرمائے۔

 لَا بَاْسَ طُہُوْرٌ اِنْ شَآءَ اللہ، لَا بَاْسَ طُہُوْرٌ اِنْ شَآءَ اللہ،لَا بَاْسَ طُہُوْرٌ اِنْ شَآءَ اللہ۔اللہ تعالٰی آپ کوصحت کی نعمت سے مشرَّف فرمائے، صحتوں، راحتوں، عافیتوں، عبادتوں، ریاضتوں، سنتوں، دینی خدمتوں،  مدنی کاموں بھری طویل زندگی عطا فرمائے۔ صبر کیجئے گا!  اِنْ شَآءَ اللہ سب بہتر ہوجائے گا۔اللہ تعالٰی اس بخار کو آپ کے لئے باعثِ ترقیِ درجات اور سببِ کفارۂ سیّآت بنائے،اٰمین۔

بے حساب مغفرت کی دعا کا مُلتجی ہوں۔(بِتَغَیُّرٍ قَلِیْلٍ)

صَلُّوْا عَلَی الْحَبِیْب!                      صَلَّی اللہُ تَعَالٰی عَلٰی مُحَمَّد

شہزادۂ  فقیہِ ملّت مفتی اَبرار امجدی مُدَّظِلُّہُ الْعَاْلِی کی عیادت

نَحۡمَدُہٗ وَ نُصَلِّیۡ وَ نُسَلِّمُ عَلٰی رَسُوۡلِہِ النَّبِیِّ الۡکَرِیۡمِ

سگِ مدینہ محمد الیاس عطار قادری رضوی عُفِیَ عَنۡہُ کی جانب سے حضرت قبلہ مفتی اَبرار صاحب امجدی اَطَالَ اللہُ عُمْرَکُمْ

اَلسَّلَامُ عَلَیۡکُمۡ وَرَحۡمَۃُاللّٰہِ وَ بَرَکَاتُہٗ !

دعوتِ اسلامی کی مرکزی مجلس ِشوریٰ کے رکن سید عارف علی باپو نے حضور کی علالت سے باخبر کیا،اللہ تَبَارَکَ  وَ تَعَالٰیآپ کو شفائے کامِلہ عاجِلہ نافِعہ عطا فرمائے،صحتوں، راحتوں، عافیتوں، عبادتوں، سنّتوں، دینی خدمتوں بھری طویل زندگی عطا کرے، آپ کا مرض آپ کے لئے باعثِ ترقیِ درجات اور سببِ کفارۂ سیّآت ہواور ذریعۂ نجات بنے۔حضور !ہمت رکھئے گا:

یہ ترا جسم جو بیمار ہے تشویش نہ کر

یہ مرض تیرے گناہوں کو مٹاجاتا ہے

اصل برباد کن امراض گناہوں کے ہیں

بھائی کیوں ا س کو فراموش کیا جاتا ہے

لَا بَاْسَ طُہُوْرٌ اِنْ شَآءَ اللہ، لَا بَاْسَ طُہُوْرٌ اِنْ شَآءَ اللہ، لَابَاْسَ طُہُوْرٌ اِنْ شَآءَ اللہ۔میرے لئے بلاحساب مغفرت کی دعا فرمائیے گا۔ آپ کے بھائی مفتی اَزہار امجدی صاحب اور دیگر تَلامِذہ، مُعتقدین مُتوسِّلین اَہلِ خانہ و خاندان کو بھی میرا سلام۔ بے حساب مغفرت کی دعا کا طلب گار ہوں۔

صَلُّوْا عَلَی الْحَبِیْب!                      صَلَّی اللہُ تَعَالٰی عَلٰی مُحَمَّد

مفتی ابرار امجدی مُدَّظِلُّہُ الْعَاْلِی کا جوابی پیغام:

اس پیغامِ عیادت کے جواب میں مفتی ابرار امجدی مُدَّظِلُّہُ الْعَاْلِی نے  اپنے صَوتی پیغام (Audio Message) کے ذریعے امیرِ اہلِ سنت کا شکریہ ادا کرنے کے ساتھ ساتھ اپنی صحت سے آگاہ فرمایا،فقیہِ ملّت مفتی جلالُ الدین امجدی عَلَیْہِ رَحمَۃُ اللّٰہ ِالْقَوِی کے شیخِ طریقت،  امیرِ اہلِ سنت کی دینی خدمات کا معترف اور آپ کے لئے دعا گَو ہونے کا ذکر کیا، دعوتِ اسلامی کے حوالے سے اپنے مثبت (Positive) جذبات کا اظہار کیا اور امیرِ اہلِ سنّت سے دعا کی درخواست کی۔

صَلُّوْا عَلَی الْحَبِیْب!                      صَلَّی اللہُ تَعَالٰی عَلٰی مُحَمَّد

محمد کامران عطاری کی تعزیت

26ستمبر 2017ء  بروز بدھ جانشینِ امیرِ اہلِ سُنّت حضرت مولانا ابواُسَید عبید رضا عطاری مدنی دَامَتْ بَرَکاتُہُمُ الْعَالِیَہ  اور نگرانِ شوریٰ حضرت مولانا محمد عمران عطاری سلمہ الباری کے بچوں کے ماموں کامران عطاری انتقال فرماگئے تھے۔ان کی نمازِ جنازہ عالمی مدنی مرکز فیضانِ مدینہ بابُ المدینہ میں ادا کی گئی  نیز انتقال کی خبر ملتے ہی شیخِ طریقت امیرِ اہلِ سنت دَامَتْ بَرَکاتُہُمُ الْعَالِیَہ  نے مَدَنی مذاکرے کے دوران ان کے لئے دعائے مغفرت کی اور اُن کے لواحقین سے تعزیت بھی فرمائی۔

تعزیت و عیادت کے متفرق پیغامات:

اس کے علاوہ امیرِ اہلِ سنت دَامَتْ بَرَکاتُہُمُ الْعَالِیَہ نے حضرت مولانا حافظ ظہوراحمدنظامی،حاجی شمشادقریشی،باباعبدالحمید (قصبہ کالونی باب المدینہ  کراچی)،حاجی محمدادریس،بنتِ عبدُالغفّار عطاریہ، اُمِّ فیضان عطاریہ (زم زم نگر حیدر آباد)، عاشق حسین، حاجی عبداللہ، مزمّل عطاری(باب المدینہ کراچی)، نگرانِ کابینہ  حاجی دانیال عطاری کے بھائی طارق بٹ عطاری(مرکز الاولیا لاہور)، محمد نوید عطاری(ایڈیٹر مدنی چینل، باب المدینہ کراچی) کی والدہ اور مدنی مُنّی، مرتضیٰ عطاری کی والدہ اورسیّد حسنات رضوی کی والدہ کے انتقال پرصُوری پیغامات (Video Messages) کے ذریعے لواحقین سے تعزیت فرمائی۔

امیرِ اہلِ سنّت دَامَتْ بَرَکَاتُہُمُ الْعَالِیَہ نےصُوری پیغام کے ذریعے اُم ِّبلال عطّاریہ(ذمہ دار حجازی کابینات،عرب شریف) اورصَوتی پیغام (Audio Message)کے ذریعے مُبَلِّغِ دَعوتِ اسلامی حافظ شفقت عطاری، ان کے بیٹے رحمت  رضا اور اُمِّ رحمت کی عیادت اوران کے لئے دعائے صحت فرمائی۔

چترال(خیبر پختون خواہ)سے مدنی مذاکروں میں شرکت کے لئے عالمی مدنی مرکز فیضانِ مدینہ بابُ المدینہ (کراچی) آتے ہوئے حادثے میں ایک اسلامی بھائی وفات پاگئے جبکہ تین زخمی ہوئے۔ واقعے کی اطلاع ملنے پر امیرِ اہلِ سنّت دَامَتْ بَرَکاتُہُمُ الْعَالِیَہ نے مَدَنی مذاکرے کے دوران مرحوم کے لواحقین سے تعزیت اور زخمیوں کے لئے دعائے صحت فرمائی۔