تمہاری دلجوئی کے لئے تمہارے حق سے کچھ زیادہ دینے کا مجھے حکم دِیا ہے۔ یہ سُن کر انہوں نے کہا : اے عُمَر!کیا تم مجھے پہچانتے ہو میں کون ہوں؟آپ  رَضِیَ اللّٰہُ عَنْہ  نے فرمایا : نہیں ، کہا میں یہودیوں کا عالِم زید بن سَعْنَہ ہوں۔ امیرُ المؤمنین حضرت سَیِّدُنا عُمَرفاروقِ اعظم  رَضِیَ اللّٰہُ عَنْہ  نے فرمایا : پھر تم نےرسولِ شاندار ، منبعِ انوار  صَلَّی اللّٰہُ عَلَیْہِ واٰلِہٖ وَسَلَّمَ  کے ساتھ ایسی گستاخی کیوں کی؟ جواب دِیا : اے عُمَر! دراصل بات یہ ہے کہ میں نے آپ  صَلَّی اللّٰہُ عَلَیْہِ واٰلِہٖ وَسَلَّمَ  میں موجود نبوت کی تمام نشانیاں پہچان لی تھیں مگر 2 نشانیوں کے بارے میں مجھے اُن کا امتحان کرنا باقی رہ گیا تھا۔ (1) : اُن کی قُوّتِ برداشت ان کے غَضَب پر غالب رہے گی اور(2) : جس قدر زیادہ اُن کے ساتھ جہالت کا برتاؤ کِیا جائے گا ، اُسی قدر اُن کا حِلم (یعنی صبر و تَحَمُّل)بڑھتا جائے گا۔ چُنانچہ میں نے ان دونوں نشانیوں کو بھی ان میں دیکھ لیا ، اے عُمَر!آپ گواہ ہوجائیں کہ میں اللہ پاک کے رَبّ ہونے ، اسلام کے دِین ہونے اور محمد  صَلَّی اللّٰہُ عَلَیْہِ واٰلِہٖ وَسَلَّمَ  کے نبی ہونے پر راضی ہوا ، میں بہت ہی مالدار آدمی ہوں ، آپ گواہ ہوجائیں کہ میں نے اپنا آدھا مال مکی مدنی سرکار ، مالک و مختار صَلَّی اللّٰہُ عَلَیْہِ واٰلِہٖ وَسَلَّمَ  کی اُمّت پر صدَقہ کر دِیا ، پھر یہ بارگاہِ رسالت میں آئے اور کلمہ پڑھ کر دامنِ اسلام میں آگئے۔ ^([1])

ترے اَخلاق پر قُرباں ترے اَوْصاف پر واری      مسلماں کیا  عَدُو بھی تیرا قائل  یا رسول اللہ^([2])

 وضاحتِ شعر : یعنی یَارسُولَاللہ! میں آپ  صَلَّی اللّٰہُ عَلَیْہِ واٰلِہٖ وَسَلَّمَ  کے عُمدہ اَوْصاف اور اچھے اَخْلاق پر قربان جاؤں کہ اپنے تو اپنے ، غَیْر بھی آپ کے اَخْلاقِ حَسَنہ اور اَوْصافِ حمیدہ سے متأثِّر تھے۔