Book Name:Shaheed Ke Fazail
شُہدائے کربلا بِلاحساب جنّت میں جائیں گے
روایت میں ہے: جنگِ صِفِّین کا موقع تھا، مسلمانوں کے چوتھے خلیفہ حضرت علیُ المرتضیٰ شیرِ خُدا رَضِیَ اللہُ عنہ میدانِ کربلا سے گزرے، یہاں آپ نے نمازِ فجر ادا کی، پِھر اس میدان سے مٹّی کی ایک مُٹّھی بھری، اُسے سُونگھا، پِھر دَرْد بھرے لہجے میں کہا: اَوْہ...! اَوْہ...!! یہ وہ جگہ ہے، جہاں ایک جماعت شہید کی جائے گی، وہ سب کے سب بغیر حساب کے جنّت میں داخِل ہوں گے۔ ([1])
سُبْحٰنَ اللہ! کیا شان ہے شُہدائے کربلا کی...!! اس روایت سے حضرت مَولا علی رَضِیَ اللہُ عنہ کا عِلْمِ غیب بھی واضِح ہے کہ وہ واقعہ جو ابھی سالوں بعد ہونا تھا، مولا علی رَضِیَ اللہُ عنہ نے پہلے ہی اُس کی خبر اِرشاد فرما دی۔
چاہیں تو اِشاروں سے اپنے، کایا ہی پلٹ دیں دنیا کی
یہ شان ہے خدمت گاروں کی، سرکار کا عالم کیا ہوگا
پِھر اِِس روایت سے یہ بھی معلوم ہو گیا کہ تمام کے تمام شُہدائے کربلا چاہے وہ اَہْلِ بیتِ اَطہَار ہوں یا صحابۂ کرام یا تابعین، جن خوش نصیبوں نے اِمامِ عالی مقام رَضِیَ اللہُ عنہ پر اپنی جانیں قربان کیں، اِنْ شَآءَ اللہُ الْکَرِیْم! سب کے سب بلا حساب جنّت میں داخِل ہوں گے۔
کربلا تیری بہاروں کو سلام جاں نثاری کے نظاروں کو سلام
قاسِم و عبّاس پر ہوں رحمتیں کربلا کے شہسواروں کو سلام
جس کسی نے کربلا میں جان دِی اُن سبھی ایمانداروں کو سلام([2])
صَلُّوا عَلَی الْحَبیب! صَلَّی اللّٰہُ عَلٰی مُحَمَّد