بیان سننے کی نیتیں

حدیثِ پاک میں ہے:اِنَّمَا الْاَعْمَالُ بِالنِّیَّات اعمال کا دار و مدار نیّتوں پر ہے۔^([1])

اے عاشقان ِ رسول! اچھّی اچھّی نیّتوں سے عمل کا ثواب بڑھ جاتا ہے۔ آئیے! بیان سننے سے پہلے کچھ اچھّی اچھّی نیّتیں کر لیتے ہیں، نیت کیجئے!*رضائے الٰہی کے لیے  بیان سُنوں گا*بااَدَب بیٹھوں گا* خوب تَوَجُّہ سے بیان سُنوں گا*جو سُنوں گا، اُسے یاد رکھنے، خُود عمل کرنے اور دوسروں تک پہنچانے کی کوشش کروں گا۔

صَلُّوْا عَلَی الْحَبِیْب!                                               صَلَّی اللہُ عَلٰی مُحَمَّد

دَجّال  سے ڈرانا سُنّتِ انبیا ہے

پیارے اسلامی بھائیو!  آج بیان کا موضوع روٹین کے موضوعات سے ذرا ہٹ کر الگ قسم کا عنوان ہے۔ آج ہم دَجّال  کے فتنے سے مُتَعَلِّق قرآن و حدیث کی تعلیمات سنیں گے۔ یہ بات ذِہن میں رکھئے گا کہ دَجّال  سے ڈرانا سُنّتِ انبیا ہے۔

جی ہاں! حضرت انس بن مالِک  رَضِیَ اللہُ عنہ   جو صحابئ رسول ہیں، خادِمِ مصطفےٰ ہیں، آپ سے روایت ہے، پیارے آقا، مکی مَدَنی  مصطفےٰ  صَلَّی اللہُ عَلَیْہِ وَ آلِہٖ وَسَلَّم  نے فرمایا: مَا مِنْ نَبِيٍّ  اِلَّا اَنْذَرَ اُمَّتَهُ ‌الْاَعْوَرَ الْكَذَّابَ یعنی جتنے نبی تشریف لائے، سب نے اپنی اپنی اُمّتوں کو کانے کذّاب (یعنی بہت بڑے جھوٹے دَجّال ) سے ڈرایا ہے۔ ^([2])

پیارے اسلامی بھائیو!  دَجّال  واقعی بہت بڑا فتنہ ہے، جو قُربِ قیامت ظاہِر ہو گا۔ آئیے! سُنّتِ انبیا پر عَمَل کرتے ہوئے اس فتنے سے مُتَعَلِّق روایات سُنتے، سُناتے ہیں۔