Rang e Chaman Pasand Na Phoolon Ki Boo Pasand

حمدو نعت

ماہنامہ فیضان مدینہ دسمبر2021

نعت

رنگِ چمن پسند نہ پھولوں کی بُو پسند

صحرائے طیبہ ہے دلِ بُلبُل کو تُو پسند

اپنا عزیز وہ ہے جسے تو عزیز ہے

ہم کو ہے وہ پسند جسے آئے تو پسند

مایوس ہو کے سب سے میں آیا ہوں تیرے پاس

اے جان کر لے ٹُوٹے ہوئے دل کو تو پسند

قُلْ کہہ کر اپنی بات بھی لب سے تِرے سُنی

اللہ کو ہے اتنی تری گفتگو پسند

ان کے گناہگار کی اُمیدِ عَفْو کو

پہلے کرے گی آیتِ لَاتَقْنَطُوْا پسند

طیبہ میں سَر جھکاتے ہیں خاکِ نیاز پر

کونین کے بڑے سے بڑے آبرو پسند

ہے خواہشِ وصالِ درِ یار اے حسنؔ

آئے نہ کیوں اَثر کو مری آرزو پسند

ذوقِ نعت ، ص126

از برادرِ اعلیٰ حضرت مولانا حسن رضا خان  رحمۃ اللہ علیہ

مشکل الفاظ کے معانی :  قُلْ : اے محبوب !آپ فرمادیں۔ عَفْو : معافی۔ لَاتَقْنَطُوْا : اللہ پاک کے اس فرمان کی طرف اشارہ ہے : )لَا تَقْنَطُوْا مِنْ رَّحْمَةِ اللّٰهِؕ- ) ترجَمۂ کنزُالایمان : اللہ کی رحمت سے نااُمید نہ ہو(پ24 ، الزمر : 53)  (اس آیت کی مزید وضاحت کے لئے یہاں کلک کریں)  ۔ اَثر : تاثیر۔