Hum Bhi Hain Gunahgaaron Mein

نعت

ہم بھی ہیں گنہگاروں میں یاصاحبِ معراج

ہے نام طلب گاروں میں یاصاحبِ معراج

تم شَمْع ہو پروانوں میں سلطانِ دو عالَم

تم چاند ہو سَیّاروں میں یاصاحبِ معراج

تم مالک و مختار ہو تم شافعِ محشر

عاصی میں خطاکاروں میں یاصاحبِ معراج

اب جانچ کھرے کھوٹے کی ہونے لگی آقا

ہلچل ہے سِیَہ کاروں میں یاصاحبِ معراج

کھوٹوں کا بھرم رکھ لیا بازارِ عمل میں

خود ہو کے خریداروں میں یاصاحبِ معراج

مَسکَن کے لیے پاؤں میں صحرائے مدینہ

مَدْفَن ہو تو کُہساروں میں یاصاحبِ معراج

ایوؔب کا مُنھ کیا ہے کہ خود قادِرِ مُطْلَق

واصِف ہے ترا پاروں میں یاصاحبِ معراج

شمائمِ بخشش ، ص33

از مولانا سید ایوب علی رضوی  رحمۃُ اللہِ علیہ