Ya Ilahi Har Jagah Teri Ata Ka Sath Ho

حمد و نعت

ماہنامہ مارچ 2021

اَلْحَمْدُ لِلّٰہِ رَبِّ الْعٰلَمِیْنَ وَالصَّلٰوۃُ وَالسَّلَامُ عَلٰی سَیِّدِ الْمُرْسَلِیْن^ط اَمَّا بَعْدُ! فَاَعُوْذُ بِاللّٰہِ مِنَ الشَّیْطٰنِ الرَّجِیْم^ط بِسْمِ اللّٰہِ الرَّحْمٰنِ الرَّحِیْم^ط

فرمانِ مصطفےٰ  صلَّی اللہ علیہ واٰلہٖ وسلَّم  ہے : مجھ پر دُرُود شریف پڑھو ، اللہ کریم تم پر رحمت بھیجے گا۔ (الکامل لابنِ عدی ، 5 / 505)

مناجات                         

یاالٰہی ہر جگہ تیری عطا کا ساتھ ہو

جب پڑے مشکل شہِ مشکل کُشا کا ساتھ ہو

یاالٰہی بُھول جاؤں نَزْع کی تکلیف کو

شادیِ دیدارِ حسنِ مصطفٰے کا ساتھ ہو

یاالٰہی جب زبانیں باہر آئیں پیاس سے

صاحبِ کوثر شہِ جُود و عطا کا ساتھ ہو

یاالٰہی گرمیِ محشر سے جب بھڑکیں بدن

دامنِ محبوب کی ٹھنڈی ہوا کا ساتھ ہو

یاالٰہی نامۂ اعمال جب کھلنے لگیں

عیب پَوشِ خلق سَتّارِ خطا کا ساتھ ہو

یاالٰہی رنگ لائیں جب مِری بے باکیاں

اُن کی نیچی نیچی نظروں کی حیا کا ساتھ ہو

یاالٰہی جب رؔضا خوابِ گِراں سے سر اٹھائے

دولتِ بیدارِ عشقِ مصطفٰے کا ساتھ ہو

حدائقِ بخشش ، ص132

از امامِ اہلِ سنت امام احمد رضا خان  رحمۃُ اللہِ علیہ